90 சொற்கள் - ஒரே மந்திரச் சொல் !

1. வள்ளுவர் கோட்டம்
2. பராசக்தி
3. 108
4. அண்ணா நூற்றாண்டு நூலகம்
5. திராவிடம்
6. எழுத்து
7. சமத்துவபுரம்
8. பூம்புகார் கலைக்கூடம்
9. முரசொலி
10. உழைப்பு
11. அண்ணா அறிவாலயம்
12. பெண்கள் சொத்துரிமை சட்டம்
13. மனோகரா
14. குறளோவியம்
15. கோயம்பேடு பேருந்து நிலையம்
16. கண்ணொளி திட்டம்
17. குளித்தலை
18. உழவர் சந்தை
19. குடிசை மாற்று வாரியம்
20. செம்மொழி
21. திருக்குவளை
22. திருமண உதவி திட்டம்
23. தொல்காப்பிய பூங்கா
24. கைரிக்‌ஷா ஒழிப்பு
25. அய்யன் வள்ளுவர் சிலை
26. இந்தி ஆதிக்க எதிர்ப்பு
27. அனைத்து சாதியினரும் அர்ச்சகர்
28. சிற்றுந்து
29. விவசாயத்திற்கு இலவச மின்சாரம்
30. இஸ்லாமியருக்கு இட ஒதுக்கீடு
31. அடையாறு தொல்காப்பியப் பூங்கா
32. கோபாலபுரம்
33. நெஞ்சுக்கு நீதி
34. பகுத்தறிவு
35. புதிய தலைமைச் செயலகம்
36. பாலைவன ரோஜாக்கள்
37. சமச்சீர் கல்வி
38. பாளையங்கோட்டை சிறை
39. கல்லக்குடி
40. அருந்ததியருக்கு இடஒதுக்கீடு
41. வசனம்
42. அண்ணா மேம்பாலம்
43. மெட்ரோ ரயில்
44. சங்கத் தமிழ்
45. ஆதிதிராவிடருக்கு கான்கிரீட் வீடுகள்
46. கலைஞர் காப்பீட்டு திட்டம்
47. மிசா
48. விவசாயக் கடன் ரத்து
49. பொன்னர் சங்கர்
50. மந்திரிகுமாரி
51. சேதுசமுத்திர திட்டம்
52. காகிதப்பூ
53. பதினோரு லட்சம்
54. அண்ணா மறுமலர்ச்சி திட்டம்
55. ஒக்கனேக்கல் கூட்டு குடிநீர் திட்டம்
56. பிச்சைக்காரர்கள் மறுவாழ்வு திட்டம்
57. மண்டல் கமிசன்
58. இலவசத் தொலைக்காட்சி
59. சுயமரியாதை
60. ராஜக்குமாரி
61. பேருந்து நாட்டுடமை
62. இளமைப் பலி
63. துறைமுகம்
64. மிகப்பிற்பட்டோருக்கு இட ஒதுக்கீடு
65. கலைஞர் வீடு வழங்கும் திட்டம்
66. சைதாப்பேட்டை
67. உதயசூரியன்
68. பெரியார் மறைவுக்கு அரசு மரியாதை
69. நெம்மேலி கடல்நீரை குடிநீராக்கும் திட்டம்
70. கிராமப்புற மாணவர்களுக்கு இடஒதுக்கீடு
71. மாநில சுயாட்சி
72. நமக்கு நாமே திட்டம்
73. ஆதரவற்ற சிறார்களுக்கு கருணை இல்லம்
74. முதல்தலைமுறை மாணவருக்கு இலவச கல்வி
75. நீதிகேட்டு நெடும்பயணம்
76. தென்பாண்டி சிங்கம்
77. 12 முறை சட்டமன்ற உறுப்பினர்
78. சென்னை
79. டைடல் பார்க்
80. தொழுநோய் மறுவாழ்வு இல்லம்
81. வருமுன் காப்போம்
82. அய்ந்து முறை முதல்வர்
83. அண்ணா கவிதாஞ்சலி
84. தலைவர்
85. உடன்பிறப்பு கடிதம்
86. மறக்கமுடியுமா ?
87. ஆகஸ்ட் 15ல் கொடியேற்றும் உரிமை
88. திருவாரூர்
89. மனுநீதி நாள்
90. தமிழ்

இந்த 90 சொற்கள் மற்றும் சொற்றொடர்களில் எதை ஒன்றை சொன்னாலும் "ஒரு சொல்" தான் நினைவுக்கு வரும்.....

# அது எமையெல்லாம் ஆட்டுவிக்கும் "மந்திரச் சொல்" !

இளைய நிலா பொழிகிறது...

" ஆயிரம் நிலவே வா, ஓராயிரம் நிலவே வா " பாலு அழைத்தது ஓராயிரம் நிலவை தான், தன் முதல் தமிழ் பாடலில்.

ஆனால் பல்லாயிரம் நிலவை கடந்துவிட்டார். 1969ல் தமிழ் திரை உலகில் நுழைந்தவர் இன்றும் நம்மை பரவசப்படுத்திக் கொண்டு தான் இருக்கிறார்.

பாலு... இப்படி தான் இசைஞானி இவரை வாய் நிறைய அழைப்பாராம். ராஜாவின் மனதில் இருப்பதை உணர்ந்து அப்படியே வெளிப்படுத்துவதில் பாலு தான் டாப். எந்த உணர்ச்சி வேண்டும், குரலிலேயே வெளிப்படும்.

ஒரு கால கட்டத்தில் வரும் படங்கள் எல்லாம் இளையராஜா இசையாக இருக்கும். படத்தில் இடம் பெற்ற பாடல்கள் எல்லாம் எஸ்.பி.பி-யாக இருக்கும். அதுவும் வெரைட்டியாக. உடன் ஜானகி குரல் என்றால் சொல்லவே வேண்டாம். விருந்து தான்.

பாலுவின் குரல் வளத்தை, நயத்தை, பலத்தை உணர ஒரு படம் போதும். " பயணங்கள் முடிவதில்லை".

மனதை வருட , " இளைய நிலா பொழிகிறது..." இரவில் இந்த இசை தாலாட்டை கேட்டால், பாலுவின் குரலில் நிலவு பொழிந்து, இதயம் நனைந்து...

இனிமையான டியுயட்க்கு " சாலையோரம் சோலை ஒன்று " பாடல். " பாவை இவள் பார்த்துவிட்டால் பாலைவனம் ஊற்றெடுக்கும், கண்ணிமைகள் தான் அசைந்தால் நந்தவனக் காற்றடிக்கும்" கேட்டு பாருங்கள பாலுவின் குரலை...

உற்சாகமூட்டும் குத்து பாடலுக்கு " ஏ ஆத்தா, ஆத்தோரமா வார்றியா ",
மென்மையான துள்ளலாக " தோகை இளம் மயில் " ,
சோக உணர்வுக்கு " வைகறையில் வைகை கரையில்".....

குரலின் நுட்பங்களை வெளிப்படுத்தும் , " ராக தீபம் ஏற்றும் நேரம் " பாடல். கேட்கும் போதே அந்த இருமல் நம்மை தொற்றிக் கொள்ளும்... " மணியோசை கேட்டு எழுந்து"

வெவ்வேறு நடிகர்களுக்கு வித்தியாசம் காட்டுவது ஒரு புறம், ஒரே நடிகருக்கே உணர்வில் வித்தியாசம் காட்டுவது ஒரு புறம், ஒரு படத்தின் பாடல்களிலேயே இத்தனை வித்தியாசம்...

# பாலு, உம் பயணங்கள் முடிவதில்லை !

( 04.06.2013 எஸ்.பி.பி பிறந்தநாள் )

பிரமிக்க வைக்கும் தலைவர் – கலைஞர்...

( 03.06.2013 அன்று விடுதலை கலைஞர்-90 பிறந்த நாள் மலரில் வெளிவந்துள்ள என் படைப்பு )


அகவை 90. ஆனால் இன்னும் இவர் இளைஞர் தான். தூரத்திலிருந்து பார்த்து பார்த்து பிரமித்த தலைவரை கிட்டே நெருங்கி பார்க்கும் போது இன்னும் பிரமிப்பு கூடிக் கொண்டே போகிறது.

தமிழை எழுத்துக் கூட்டி படித்தக் காலத்திலிருந்து, முரசொலியில் அவர் எழுத்துக்களை படித்து தான் என் தமிழ் வலுப்பெற்றது. அப்போதிருந்தே அவர் எழுத்து, பேச்சு, கொள்கை, அரசியல், நடவடிக்கைகள் பிரமிக்க வைக்கும்.

வழக்கமாக தூரத்திலிருந்து பார்த்து பிரமித்தவர்களை கிட்டே நெருங்கும் போதும் சில பிம்பங்கள் நொறுங்கும், பார்வைகள் மாறும், உயரம் குறையும். ஆனால் தலைவர் கலைஞரிடத்தில் இந்த நிலை மாறும்.

நான் பள்ளியில் படித்தப் போது, கல்லூரியில் படித்தப் போது, அரசியலுக்கு வந்தப் புதிதில் எப்படிப் பார்த்து வியந்தேனோ, அதில் கிஞ்சிற்றும் குறைவில்லாமல் இன்றும் வியக்கிறேன்.

பதிமூன்று ஆண்டுகளுக்கு முன்பு முதல் முறையாக மாவட்ட செயலாளரான போது பார்த்ததைவிட, கடந்த சட்டப்பேரவையில் ச.ம.உ ஆக பணியாற்றியப் போது
பார்த்ததைவிட, இப்போது இன்னும் நெருக்கத்தில் பார்க்கும் வாய்ப்பு.

90-லும் குறையா உழைப்பு, வற்றாத எழுத்து, தொடர்ந்து கற்கும் ஆர்வம், தன்னை புதுப்பித்துக் கொள்ளும் பாங்கு, நேரந் தவறாமை, பதில் சொல்லத் தயங்காமை, பிரச்சினைகளை கண்டு ஓடி ஓளியாமை என வியக்க வைக்கிறார்.

இதைத் தாண்டி அவரது எளிமை. பொது வாழ்க்கையில் இருக்கும் யாரும் கைக் கொள்ள வேண்டியது...

கடந்த 1996 தி.மு.க ஆட்சிக்காலம்....
இரவு நேரம். சென்னையின் ஒரு பகுதியில் மின்தடை ஏற்படுகிறது. டிரான்ஸ்பார்மர் சீர்கெட்டதால் என தெரியவருகிறது. வழக்கம் போல் ஆற்காட்டாருக்கு அர்ச்சனை நடக்கிறது. மின்வாரிய அலுவலகத்தை தொலைபேசியில் தொடர்பு கொள்கிறார்கள், போனை யாரும் எடுக்கவில்லை.

ஒரு நடுத்தர வர்க்கத்து பெண் முதலமைச்சர் இல்ல தொலைபேசி எண்ணை தேடுகிறார். கிடைக்கிறது. தொடர்புகொள்கிறார், யாராவது உதவியாளர்கள் தொலைபேசியை எடுப்பார்கள் என்ற எண்ணத்தோடு.

" வணக்கம். கருணாநிதி பேசுகிறேன் " என்ற கனிவான கம்பீரக் குரல். இந்தப் பெண் திகைத்துப் போகிறார். தடுமாறி விபரத்தை சொல்கிறார். எந்தப் பகுதி என்று விபரம் கேட்டுக் கொள்கிறார் தலைவர் கலைஞர். உடனடியாக அதிகாரிகள் தொடர்பு கொண்டு சீர் செய்தது தனிக்கதை.

இன்று முதல்வர் இல்ல தொலைபேசி எண் கிடைத்தால், யாராவது பேச முன்வருவார்களா தைரியமாக ? நிச்சயம் தற்போதைய முதல்வர் எடுக்கமாட்டார் என்பது அனைவருக்கும் தெரியும். முதல்வரிடம் அல்ல, உதவியாளர்களிடம் பேசவே பயப்படுவார்கள் பொதுமக்கள் இன்று .

ஆறு மாதங்களுக்கு முனபாக.....

ஒரு நாள் அறிவாலயத்தில் தலைவர் கலைஞர் வாகனம் நுழைகிறது. தலைவரைக் கண்டக் கழகத் தோழர்கள் வாழ்த்தொலி எழுப்பி ஆரவரிக்கிறார்கள். தலைவர் சக்கர நாற்காலியில் அமர்ந்து கையசைத்து அன்பை ஏற்றுக் கொண்டு, அறிவாலயத்திற்குள் நுழைகிறார்.

“ தாத்தா வணக்கம்” என ஒரு மழலைக் குரல், திரும்பிப் பார்க்கிறார். தகப்பனின் கையிலிருந்த அய்ந்து வயதுக் குழந்தை கையசைக்கிறது. அவர்களை அழைத்து வரச் சொல்லி குழந்தையிடம் அன்பொழுக விசாரிக்கிறார்.

நீலகிரியிலிருந்து வந்தக் குடும்பம் மூன்று நாட்களாக தலைவரோடு புகைப்படம் எடுத்துக் கொள்ள அறிவாலயம் வந்துக் காத்திருக்கிறார்கள். தலைவர் உடல் நலம் காரணமாக மூன்று நாட்களும் அறிவாலயம் வரவில்லை, வாய்ப்பு கிட்டவில்லை. அன்றும் உடல் நலம் சரியில்லை தான், அவசரப்பணி நிமித்தமாக வந்திருந்தார்.

புகைப்படக் கலைஞரை வரச்சொல்லி அவர்களோடு புகைப்படம் எடுத்துக் கொண்டு அனுப்பி வைக்கிறார். அந்தக் குழந்தைக்கும், அதன் பெற்றோருக்கும் தலைவரோடு புகைப்படம் எடுத்துக் கொள்வது வாழ்நாள் கனவு. இனி அந்தப் படம் அவர்கள் குடும்பத்திற்கு வாழ்நாள் சாதனை.

கடந்த 2011 சட்டமன்றத் தேர்தல்...

வாக்குப் பதிவு முடிந்து ஓட்டு எண்ணிக்கைக்கு ஒரு மாத இடைவெளி. அப்போது தலைவரை சந்திக்கிறேன். மாவட்டத்தில் உள்ள தொகுதிகளின் வெற்றி நிலவரம் குறித்து எடுத்து சொன்னேன், கேட்டுக் கொண்டார். “நான் போட்டியிட்ட குன்னம் தொகுதி நன்றாக உள்ளது, நாம் வெற்றி பெறுவோம்” என்றேன்.

“ உன்னைப் பார்த்தாலே தெரியுதய்யா, நல்லாதான் இருக்கும்” என்று சொல்லிவிட்டு என்னை மேலும் கீழும் பார்த்தார். முதலில் எனக்கு புரியவில்லை. பிறகு தான் புரிந்தது, தேர்தலில் அலைச்சலால் ஏற்படும் நலிவு என் உடலில் தெரியவில்லை என்பதை அப்படி நகைச்சுவையாகக் குறிப்பிட்டிருக்கிறார்.

வாக்கு எண்ணிக்கை முடிந்து சந்திக்க சென்றேன். தாமதமாக வாக்கு எண்ணிக்கை முடித்ததால், இரவு தான் தலைவரை சந்திக்க செல்ல முடிந்தது. கழகம் ஆட்சியை இழந்து, எதிர்கட்சி அந்தஸ்த்தையும் இழந்திருந்த மிக சங்கடமான சூழல். வேறு தலைவராக இருந்திருந்தால் சந்தித்திருக்க மாட்டார்கள்.

ஆனால் தலைவர் வரச் சொன்னார். ஓய்வுக்கு செல்ல ஆயத்தமாக கைலியும் பனியனும் அணிந்திருந்தார். வெற்றி விபரத்தை சொன்னேன், வாழ்த்தினார். அப்போது திருச்சியில் போட்டியிட்ட அன்பில் பெரியசாமியும், திருவெறும்பூரில் போட்டியிட்ட கே.என்.சேகரனும் வந்தார்கள்.

“ என்னய்யா எப்பவும் ஜெயிக்கற தொகுதி, என்னாச்சு ?” எனக் கேட்டார் தலைவர். தோல்விக்கான காரணத்தை சொன்னார்கள். அதில் உள்ள நியாயத்தை ஏற்றுக் கொண்டார்.

2006-ல் வெற்றி பெற்று வாழ்த்து பெற சென்ற போது, முதல்வராக பொறுப்பேற்கும் மகிழ்ச்சி சூழலில், என்ன தெளிவோடு இருந்தாரோ, அந்த தெளிவோடு தான் 2011 தோல்வியின் போதும் தலைவர் கலைஞர் இருந்ததை பார்த்தேன்.


# எளிமையான ஆனால் வலிமையான தலைவர் !

( விடுதலை கலைஞர்-90 பிறந்த நாள் மலரை, பெரியார் திடலில் தலைவர் கலைஞர் அவர்கள் வெளியிட ஆசிரியர் கி.வீரமணி அவர்கள் பெற்றுக் கொள்ளும் காட்சி )

தமிழை மறவாமல், சுவாசமாய் கொண்டிருக்கும் டாக்டர்....

 

விழா துவங்கியது. இறை வணக்கம்.

" உற்றுழி உதவியும் உறுபொருள் கொடுத்தும்

பிற்றைநிலை முனியாது கற்றல் நன்றே "
என்று கல்வியின் பெருமையை வலியுறுத்தி பாடல் ராகத்தோடு பாடப்பட்டது.

முன் வரிசையிலிருந்தவர் ஆச்சரியத்தோடு கேட்டார்," இது என்ன பாட்டு"

 " புறநானூறு"

" எங்கே புடிச்சீங்க"

 " ஒரு ஃபோன் தான். நம்ம கூகுள் சொல்லிட்டாரு"

 

விழா நடந்த இடம் : தமிழ்துறை அல்ல, செட்டிநாடு மருத்துவ பல்கலைக் கழகத்தின் Reproductive medicine துறை.

அந்த கூகுள் : அந்த துறையின் தலைவர் Dr. பாண்டியன்.

பேசிக் கொண்டவர்கள் : அங்கு பணிபுரியும் டாக்டர்கள்.

 

விழாவில் பேசியவர்கள் அத்தனை பேரும் ஆங்கிலத்தில் உரையாற்றினாலும் "வணக்கம்" என்றே தமிழில் துவங்கினார்கள். திருக்குறளை மேற்கோள் காட்டினார்கள். இது மருத்துவக் கல்லூரியில் நடப்பது வித்தியாசமானது.

" ஃபோன் செய்தால் "வணக்கம்" சொல்லி நம்மை தமிழில் பேச வைப்பார் டாக்டர்.பாண்டியன். அவர் தமிழ் பற்று அப்படி" சொன்னவர் நிர்வாக அலுவலர் மனோகர்.

செயற்கை கருத்தரிப்பு துறையின் பிதாமகன்கள் பேராசிரியர். எட்வர்ட் மற்றும் டாக்டர்.ஸ்டெப்டோ . நோபல் பரிசு பெற்றவர்கள் இந்த துறையில்.

பேராசிரியர். எட்வர்ட் அவர்களுடன் பணிபுரிந்த இந்திய மருத்துவர் டாக்டர். பாண்டியன். உலகம் முழுவதும் நடைபெறும் இந்தத் துறையின் கருத்தரங்குகளில் பங்கு பெற அழைக்கப் படுபவர்களில் முதன்மையானவர்.

சென்னை மருத்துவக் கல்லூரி, அப்போலோ மருத்துவமனை என பல இடங்களில் IVF கிளினிக்குகளை துவக்கி வைத்தவர். இந்தியாவின் முதல் விந்து வங்கியை துவங்கியவர் என பல முதல்'களுக்கு சொந்தக்காரர். பல விருதுகள் இவர் வீட்டு அலமாரியில். அடுக்கிக் கொண்டே போகலாம்.

அவர் அறையில் சந்தித்தேன். மேசையில் பெரிய பெரிய மருத்துவப் புத்தகங்களுக்கு மேல் "திருக்குறள்". " தினம் ஒரு திருக்குறள் படித்துவிட்டு தான் அன்றைய பணிகளை துவங்குவேன்" .

" இவ்வளவு தமிழ் ஆர்வத்தோடு இருக்கிறீர்களே, மகிழ்ச்சி"
" அப்படியே உணர்வோடு கலந்தது "
" சொந்த ஊர் எது ?"
" காஞ்சிபுரம் அருகே ஒரு சின்ன கிராமம், நெ.து.சுந்தரவடிவேலு அவர்கள் பிறந்த கிராமம்"
" அப்படியா, சென்னை பல்கலைக் கழகத்தின் முதல் துணை வேந்தர் ஆயிற்றே !"
" ஆம். அவர் எனது பெரியப்பா "

தனது மருத்துவத் துறையின் உச்சத்திற்கு போனாலும், தமிழை மறவாமல், சுவாசமாய் கொண்டிருக்கும் டாக்டர் மன்னிக்க, மருத்துவர் பாண்டியன்.
இவரை கூகுள் என்று சொன்னவர் டாக்டர். ராதா . டாக்டர்.பாண்டியனின் துணைவியார், இதே துறையில் பணியும் பேராசிரியர். யாரை பார்த்தாலும் வாஞ்சையோடு டயட் டிப்ஸ் தான். பல மொழியில் பேசி, வருகை தரும் நோயாளிகளின் மனம் கவர்ந்தவர்.

குழந்தையில்லாமல் வாடும் பல தம்பதிகளின் வாழ்வில் ஒளியேற்றி வைக்கும் தம்பதி. அதே சமயத்தில் மருத்துவ நெறிமுறைகளை ஒரு நூலும் தவற விடாதவர்கள். வர்த்தக ரீதியில் செல்வதை விரும்பாமல், கல்வியில், அடுத்தவர்களை வளர்த்துவிடுவதில் ஆர்வம் காட்டும் மருத்துவர்கள்.

# மருத்துவர்கள் பாண்டியன், ராதா வாழ்க, இன்னும் பல குடும்பம் தழைக்க....

 

 

தினமும் பாடும் எனது பாடல் காற்றோடும் ஆற்றோடும்

மெல்ல திறந்தது கதவு - கல்லூரியில் சேர்ந்து பார்த்த முதல் படம். இளையராஜா எம்.எஸ்.வியோடு இணைந்து இசை அமைத்த படம். ஊருசனம் தூங்கிருச்சி, வா வெண்ணிலா என அனைத்து பாடலும் ஹிட்.

"சின்னச்சின்ன வண்ணக்குயில்" பாடல் கல்லூரி ஹாஸ்டலில் ஒன்ஸ்மோர் கேட்கப்பட்டு, திரும்ப திரும்ப போடப்பட்ட எண்ணிக்கை புரொஜெக்டர் ஆப்பரேட்டருக்கே தெரியாது. இந்த பாடலின் இடையே வரும் "ஒஹஹோ ஒஹஹோ" ஹம்மிங் அடுத்த ஹாஸ்டல் வரை எட்டும், ஒட்டு மொத்த மாணவர்களின் குரலில்...

மௌனராகம் திரைப்படத்தில் இதை தவிர அனைத்து பாடல்களும் ஹிட். அதிலும் 'மன்றம் வந்த தென்றலுக்கு, நிலாவே வா' பாடப்படாத கல்லூரி மேடைகளே கிடையாது. உருகி உருகிப் பாடுவார்கள் ராஜாவின் இசையில் உருகி.

கடலோரக் கவிதைகள். முட்டம் சின்னப்பதாஸாக மாறி ' அடி ஆத்தாடி இளம் மனசொன்னு' பாடலை ஹாஸ்டல் பாத்ரூம்களை ரெக்க்கார்டிங் தியேட்டராக பாவித்து ஹிட் அடித்து திரிவார்கள் மாணவர்கள். ராஜாவின் கைங்கர்யம். 'போகுதே போகுதே, கொடியில மல்லிகப்பூ' பாடாத வாய்கள் இல்லை.

கல்லூரி சூழலில் 'மெல்ல திறந்தது கதவு', நகர சூழலில் 'மௌனராகம்', கடலோர சூழலில் 'கடலோரக் கவிதைகள்' இப்படி எந்த படமாக இருந்தாலும் பாடல்கள் ஹிட்டடித்த ராஜா தன் களமான கிராமத்து கதை அமைந்து விட்டால் விடுவாரா.

'அம்மன் கோவில் கிழக்காலே' ஒவ்வொரு பாடலும் சொல்லி வைத்து ஹிட். பீட்டர் விடும் சென்னை மாணவர்களும் பாடிய பாடல்கள். 'சின்ன மணிக்குயிலே' அப்போது திருமண வீடுகளின் தேசியகீதம். 'பூவ எடுத்து ஒரு மாலை, உன் பார்வையில் ஓராயிரம், காலை நேரப் பூங்குயில்' காதுகளில் இன்றும் ஒலிக்கிறது.

அவர் கையிலிருக்கும் வாத்தியம் மட்டும் எப்படி தனி ஒலி தருகிறது, எப்படி வித்தியாசமாய் இசைக்கிறது, அனைவரையும் கட்டிப் போடுகிறது....

வீட்டை பிரிந்து கல்லூரி விடுதியில் தங்கிய எங்களுக்கெல்லாம் அப்போதைய தோழர் ராஜா தான். இசை போட்டியில் பங்கேற்கும் நண்பர்கள், காதல் மன்னர்களாய் திரிந்தவர்கள், தனியாய் படிப்பவர்கள், தத்துவவாதிகள் என எல்லோருக்கும் அப்போது அவர் தான் உற்ற துணை.

இன்றும் அவர் தான் உற்ற துணை.

"காலை நேர பூங்குயில் கவிதை பாட தூண்டுதே

கலைந்து போன மேகங்கள் கவனமாக கேட்குதே

இளமை என்னும் மோகனம் இணைந்து பாடும் என் மனம்

பட்டு விரித்தது புல்வெளி பட்டுத் தெறித்தது விண்ணொளி"

# தினமும் பாடும் எனது பாடல்

காற்றோடும் ஆற்றோடும் இன்றும் என்றும் கேட்கும் என்றென்றும்....

அது ஒரு கிரிக்கெட் காலம்....

"சண்முகா தியேட்டர் முனையிலிருந்து, ஆண்டிமடம் அணியை சேர்ந்த சந்திரமோகன் பந்து வீசுகிறார். பாளையங்கோட்டை அணியை சேர்ந்த மோசஸ் எதிர்கொள்கிறார். சற்றே மிதமான வேகத்தில் வந்த பந்தை அடித்தாட முயல்கிறார். ஏமாற்றிய பந்து கீப்பரின் கையில் தஞ்சமடைகிறது"

பள்ளி மைதானத்தின் இலையுதிர்ந்த மரத்தின் உச்சியில் கட்டிய புனல் ஒலிப்பெருக்கியிலிருந்து உள்ளூர் கமெண்டேடரின் வர்ணனை காதை பிளக்கும். 

கோடை வெயிலை வீணாக்காமல், மதிய உணவு குறித்த கவலை இல்லாமல், நண்பகல் இரண்டு மணிக்கு உச்சி வெயிலில் கிரிக்கெட் தவமிருந்த காலம்.

வரும் பந்தை தாண்டவிட்டு, மண்ணை தட்டுகிறாரா பந்தை தட்டுகிறாரா எனத் தெரியாமல் தட்டி நான்குக்கு விரட்டும் அசாருதீன்,

சீறி வரும் பந்தை பார்க்காமல் அலட்சியமாக நின்று கொண்டிருந்து எப்போது பாய்ந்தார், பிடித்தார் எனத் தெரியாமல் லாகவமாக கேட்ச் பிடித்து ஃபீல்டிங்கில் கலக்கிய அஜய் ஜடேஜா.

இருந்த சாதனைகளை எல்லாம் முறியடித்து, புதிய சாதனைகளை படைத்து, அதையும் தானே முறியடித்து கிரிக்கெட்டின் சிறுகடவுளாக அவதாரமெடுத்த சச்சின் டெண்டுல்கர்.

அலட்டிக் கொள்ளாமல் அமைதியாய் சாந்தசொரூபியாய் சாதித்த அணில் கும்ப்ளே, சிக்ஸ் சித்து... இப்படி கிரிக்கெட் ஒரு மதமாக இந்தியாவில் அவதாரமெடுத்த காலம்.

டெஸ்ட் கிரிக்கெட் என ரிலாக்ஸாக ஆடி பிறகு லிமிட்டெட் ஓவராக டிரிம் செய்யப்பட்டு, 5 நாள், 3நாள் போய் ஒரு நாள் கிரிக்கெட்டாகி அதுவும் 20-20 என அவசர உலகின் பாஸ்ட்ஃபுட் கலாச்சாரத்தில் சுருங்கி...
அதற்கேற்ப வீரர்களும் பிஃக்ஸிங்கில் இறங்கி மேட்ச் பிஃக்ஸிங், ஸ்பாட் பிஃக்சிங், பால் பிஃக்சிங் என கண்டுபிடித்து....

சோடா மூடியால் பந்தை சுரண்டியது போல், லலித் மோடியால் கிரிக்கெட் சுரண்டப்பட்டு ஐ.பி.எல்-லோடு கிரிக்கெட் மீதான நம்பிக்கை சுரண்டப்பட்டு...

# அது ஒரு கிரிக்கெட் காலம்....

               *****************************************************************   

26.05.2013 அன்று நடைபெற்ற IPL போட்டிகளில் சென்னை சூப்பர் கிங்ஸ் அணிக்கும், மும்பை இந்தியன்ஸ் அணிக்கும் நடைபெற்ற இறுதி போட்டியின் முடிவு பிக்ஸ்சிங்கின் அருமையை வெளிப்படுத்துகிறது...

இனி கமென்ட்ரி....

யோவ் சுத்தி சி.பி.ஐ நின்னு பாத்துகிட்டு இருக்கான்யா. 1 பால், 2 பால்ல அவுட் ஆகாதிங்கய்யா. 10 பால்க்காவது நில்லுங்கைய்யா...

# சி.பி.ஐ ஆபிச்சர்ஸ் கொஞ்சம் கண்ணயும் காதயும் மூடுங்க....

                         *************************

ஸ்ரீசாந்த் போட்ட பந்து இன்னும் ஸ்பின்னாயி சுத்துதோ

சி.எஸ்.கே 41/6 (7.5 ஓவர்ஸ்)

# ஓவர், ஓவர்ர்ர்ர்ர்ர்ர்ர்...................

                       ******************************

அண்ணே, சீக்கிரம் கைல துண்டு போடுங்க....
சி.எஸ்.கே 58/7 (11.2)

# ரெடியா ???? 

                       ******************************

மும்பை இந்தியன்ஸ் : 148/8 (20 ஓவர்ஸ்)

சென்னை சூப்பர் கிங் : 125/9 (20 ஓவர்ஸ்)

                        *****************************

டோனி சார், டோனி சார்... இவனுங்க அப்பவே படம் போட்டு காட்டிக் கொடுத்துட்டானுங்க...
God of Big Deals.
( மும்பை இந்தியன்ஸ் வெற்றி)

# பெரும் பேரங்களின் கடவுள் ! 

இன்ப சக்கரம் சுத்துது... அதில் நீங்கள் தான் எங்கள் சக்கரவர்த்தி !

கேமரா விரிகிறது. பனிமலை, சிம்லா. மக்கள் திலகம் எம்.ஜி.ஆர் சிகப்பு நிற சூட்கேஸோடு ஓடி வருகிறார். பனிமலையை கண்ட ஆனந்தத்தில் கண்கள் விரிகிறது. உற்சாகமாகிறார்...

“ புதிய வானம் புதியபூமி
எங்கும் பனி மழை பொழிகிறது
நான் வருகையிலே என்னை வரவேற்க 
வண்ண பூமழை பொழிகிறது”

உற்சாகம் நம்மையும் தொற்றுகிறது. நாமே சிம்லாவில் இருக்கிறோம். இப்போது நாமே சிகப்பு சூட்கேஸோடு ஓட ஆரம்பிக்கிறோம், ஆட ஆரம்பிக்கிறோம்.

                **************************************************

நடிகர் திலகம் சிவாஜி குழந்தையின் தொட்டிலை ஆட்டிக் கொண்டிருக்கிறார். மெல்ல மெல்ல அசைகிறது தொட்டில். 

“ ஏன் பிறந்தாய் மகனே ஏன் பிறந்தாயோ
இல்லை ஒரு பிள்ளை என்று 
ஏங்குவோர் பலர் இருக்க 
இங்கு வந்து ஏன் பிறந்தாய் செல்வமகனே” 

கடும் சோகம் நம்மை கவ்வுகிறது. நாமே தொட்டிலை ஆட்டுகிறோம். நாம் பாட ஆரம்பிக்கிறோம்.

                         *************************************************

நம்மை அறியாமல் அந்தக் குரல் மெல்ல நம்மை ஆக்கிரமிக்கிறது...
நாமே பாடுவதாக தோன்றுகிறது. மகிழ்ச்சியோ, துக்கமோ நம்மை அதில் ஆழ்த்துகிறது.

எம்.ஜி.ஆர், சிவாஜி மாத்திரமல்ல தமிழ், தெலுங்கு, மலையாளம் என பல மொழிகளில் பல நடிகர்களுக்கு உயிர் கொடுத்த குரல் பிரிந்துவிட்டது.

பல மனிதர்களுக்கும் உற்சாகமோ, அமைதியோ தேவைபடுவதை கொடுக்கும் குரல் மருத்துவர்.

                   *****************************************************

வசந்த மாளிகையில் சிவாஜி சுழல்கிறார்....

“ஒரு சட்டங்கள் தர்மங்கள் ஏதுமில்லை
இன்ப சக்கரம் சுத்துதடா
ஹ ஹ ஹ ஹா....
அதில் நான் சக்கரவர்த்தியடா....”

# இன்ப சக்கரம் சுத்துது... ஆம் நீங்கள் தான் எங்கள் சக்கரவர்த்தி !